John 11

Lazarus Sihna

1Amah Mary le a sanggamnu Martha tenna Bethany khua mi ahi Lazarus kici mi khat a ci na hi. 2Hih a cina pa sanggamnu Mary pen, Topa tunga sathau namtui sunga a khepekte a sama a nulsaknu mah ahi hi. 3Tua ciangin a sanggam numeite in Jesu kiangah, “Topa aw, na itpa cina hi,” ci-in kam a vaikhak uh hi. ^a

4 Jesu in hih thu a zak ciangin, “Hih natna sih nading hi lo hi. Hi lo hi, hih tungtawnin Pasian Tapa kiminthangsaka Pasian in minthanna a ngah nading ahi hi,” a ci hi. 5Jesu in Martha le a sanggamnu le Lazarus a it hi. 6Ahi zongin amah in Lazarus cina hi cih za napi a omna mah ah ni nih a taam lai hi.

7 Tua ciangin ama nungzuite kiang ah, “Judea ah ciah kik ni,” a ci hi.

8 Ahi hangin amaute in, “Rabbi aw, Jew-te in suang tawh den hong sawm uh sawt nai lo hi, tuapi mah tua lai-ah pai kik ding na hi hiam?” a ci uh hi. ^b

9 Jesu in, “Khuavak hun sung nai sawm-le-nih pha hi lo ahi hiam? Sun lai-a lampaite in hih leitung khuavak hangin khua mu ahi manin a kisuikha kei ding hi. 10Zanin lam a pai ciangin khua vak lo ahi manin a kisuikha uh hi,” ci-in a dawng hi. ^c

11 Hih teng a cih khit ciangin amaute tunga a thugen ban zomlai-a, “I lawmpa Lazarus ihmu hi, ahi hangin amah phong dingin tua lai-ah ka pai ding hi,” a ci hi. ^d

12 A nungzuite in, “Topa, ihmu ahileh a nuamtuam ding hi,” ci-in a dawng uh hi. 13Jesu in a si a genna hi napi, a nungzuite in ihmut ngei-a ihmu a sa uh hi.

14 Tua ciangin amaute kiangah, Lazarus si zo hi; 15na up theih nadingun kei tua lai-a ka om loh note adingin ka nuam hi. Ahi zongin ama kiangah pai ni,” ci-in a telgen hi.

16 Tua ciangin Thomas (Didymus kici) in a nungzui dangte kiangah, “Amah tawh i sihkhawm theih nadingin ei zong va zui ni,” a ci hi.

Unau Numeite Jesu in Hehnem

17 Jesu a tun ciangin, Lazarus han sungah a om zawh ni li pha zo hi, cih a thei hi. 18Jerusalem panin Bethany tai ▼

▼11.18 Greek ah stadia sawm le nga (kilometre 3 bang)

nih sangin naizaw a, 19a sanggampa sihna hangin Mary le Martha hehnem dingin Jew-te tampi a pai uh hi. 20Martha in Jesu tung ta cih a zak ciangin a dawn dingin paikhia-a, inn ah Mary a om lai hi.

21 Martha in Jesu kiangah, “Topa, hih lai-ah om lecin ka sanggampa a si kei ding hi. 22Ahi hangin tu nangawnin na nget peuhpeuh Pasian in hong pia ding cih ka thei hi,” a ci hi. ^f

23 Jesu in tuanu kiangah, “Na sanggam-pa a tho kik ding hi,” a ci hi.

24 Martha in, “Ni tawp ni-a thawhkik hun ciangin a thawh kik ding ka thei hi,” ci-in a dawng hi. ^g

25 Jesu in tuanu kiangah, “Keimah in, thawhkikna le nuntakna ka hi hi. Kei hong um mi a sih hangin a nungta ding hi; 26nungta-a kei hong um peuhmah a si ngei kei ding hi. Hih thu na um hiam?” ci-in a dong hi. ^h

27 Tuanu in, “Ka um hi Topa aw, leitunga hong pai ding Pasian Tapa Christ ▼

▼11.27 Ahikeh Messiah

na hi, cih ka um hi,” ci-in a gen hi.

28 Hih teng a gen khit ciangin kileh kika, a sanggamnu Mary a va sam tuam hi. Amah in, “Siapa hih lai ah om-a, nang hong kan hi,” a ci hi. 29Mary in hih thu a zak ciangin dingkhia vat-a a kiangah a va pai hi. 30Tua hunin Jesu khua sungah lut nai lo a, Martha tawh a kituahna mun ah om lai hi. 31Inn sunga Mary tawh a om, amah a hehnem Jew-te in, Mary thakhatin dinga a paikhiat a muh uh ciangin han ah pai-a a va kap ding sa in a zui uh hi. ^j

32 Jesu omna mun ah Mary tunga, amah a muh ciangin a khephung ah bokin, “Topa, nang hih lai-ah om lecin ka sanggampa a si kei ding hi,” a ci hi.

33 Jesu in tuanu kah mu a, amah a zui Jew-te zong a kah uh a muh ciangin a lungsim ah na sa mahmah in a lunggim hi. 34Amah in, “Amah koi-ah sial na hi uh hiam?” ci-in a dong hi.

Amaute in, “Topa aw, hong pai inla hong en dih in,” a ci uh hi.

35 Jesu a kap hi. ^k

36 Tua ciangin Jew-te in, “En sin uh, nak it mahmah si!” a ci uh hi.

37 Ahi hangin amaute pawlkhat in, “Mittawte khua a musak theipa in amah silosak thei lo hi ve maw?” a ci uh hi. ^l

Jesu in Lazarus Misi pan Thosak

38 Jesu, a lungsim sunga na sa mah mah kawmin han lam zuanin a pai hi. Tua han, a vang suangpek a kikhak kawhawm khat ahi hi. 39Jesu in, “A suang lakhia un,” a ci hi. ^m

Misipa sanggamnu Martha in, “Ahi zongin Topa, tua lai-a a om zawh ni li pha khin ta a tu-in namsia ta hi,” a ci hi.

40 Tua ciangin Jesu in, “Na up leh Pasian minthanna na mu ding hi, hong ci zo hi lo ka hi hiam?” a ci hi.

41 Tua ciangin suang a likkhia uh hi. Tua khit ciangin Jesu dakto a, “Pa aw, kong ngetna hong zazo na hi manin ka lung dam hi. 42Ka thu nong sang tawntung cih ka thei hi. Ahi hangin hih lai-a ding mite phattuam nading, nang kei hong sawl na hilam a up nading uh deihna-in hih ka gen hi,” a ci hi. ⁿ

43 Hih teng a cih khit ciangin Jesu in, “Lazarus, hong paikhia ou!” ci-in nakpi in a sam hi. 44Misipa paikhia-a, a khut le a khete hanpuan tawh kitunin, a maitang puan khatin a kituam hi. ^o

Jesu in amaute kiangah, “Han puante phelkhia unla, amah paisak un,” a ci hi.

Jesu Thah Kisawmsim

45 Tua ahi manin Mary inn-a a hawh, Jesu sepsa a mu Jew-te tampi in amah a um uh hi. 46Ahi hangin pawlkhatte Pharisee-te kiangah pai uh a, Jesu hihsa teng a gen uh hi. 47Tua ciangin siampi makaite le Pharisee-te in Sanhedrin kikhop a sam uh hi.

Amaute in, “A bangci tazen i hi hiam? Hih mipa in limlamdangte bawlbawl a; 48hih banga i hih saksak leh mi khempeuh in amah um ding uh a, tua ciangin Rome mite hong kuanin i mun ▼

▼11.48 Ahikeh biakinnpi

le i minam a lamang ding uh hi,” a ci uh hi.

49 Tua ciangin amaute lakah tua kum a tulpi a sem Caiaphas kici pa paukhia a, “No bangmah thei kei uh teh! 50Minam khat a bupa a manthan sangin mipite tangin mi khat si leh a hoihzawk lam na phawkkha kei uh hi,” a ci hi.

51 Amah in ama lungsim puaka hih thu a gen hi lo hi. Ahi hangin tua kuma tulpi ahi bangin Jew minam tangin Jesu si ding hi, cih a genkhol hizaw hi. 52Tua minam tang ding bek hi loin a kitheh thang Pasian tate tang ding zong hi a, amaute kaikhawm kikin khat a suahsak nading ahi hi. 53Tua ahi ciangin tua ni-a kipan amah thah nading a gelsim uh hi. ^q

54 Tua ahi manin Jew-te lakah mipi theihin Jesu a pai nawn kei hi. Tua sangsikin sehnel-gam gei Ephraim khua omna kualah kileh kik zaw a, a nungzuite tawh tua lai-ah a om uh hi.

55 Jew-te Paisan-pawi hun a nai mahmah ciangin kisakkholhna, Paisan-pawi ma-a biakna ngeina-a kisiansuahna bawl dingin gamsung khua panin mi tampi Jerusalem ah a paito uh hi. 56Amaute in Jesu zongzong uh a, biakinnpi huang-sung tengah dingin, “Nang bang na ci ngaihsut hiam? Pawi sungah amah hong pai lo ding hi ve maw?” a kici uh hi. 57Ahi hangin siampi makaite le Pharisee-te in, amah a mat theih nadingun Jesu omna mun a mu a om leh amau kiangah a va gen nadingun thu a pia uh hi. ^r